ارسل عدد من سكان مدينة (الحي المتميز ) عدة رسائل لبريد الجريدة يستغيثون بالمهندس عمار مندور رئيس جهاز المدينة من انقطاع المياه المتكرر
وقال أحد سكان الحي المتميز ،نحن سكان الحى المتميز فى مدينة بدر نعانى من انقطاع المياه منذ شهرين انقطاع متواصل
ارجو الاهتمام بالحى ضرورى وخاصة من زيادة السكان به نحن سكان المنطقة ٧ قطعة ٢٠٠
واضاف اخر ،انا عريس جديد في الحي المتميز مدينة بدر والمياه قاطعه ديما ومش بتيجي غير ساعه واحده تقريبا في اليوم والواحد مش عارف يعيش
وطالب أحد السكان أيضا ، بضرورة النظر في مشكله انقطاع المياه في الحي المتميز مدينه بدر موكدا علي انقطاعها منذ من شهرين
وقالت نوران ،احدي سكان الحي المتميز أن المياه مقطوعة عن الحي المتميز المنطقه السادسه منذ اكثر من شهرين ولازم نشتري مايه من العرب وعندي أطفال صغيرين مش عارفه اعملهم اكل او احميهم او انضف ليهم او بيتي ما ينفعش خالص كدا كأني عايشه في الصحراء باولادي !!!
واضاف ساكن اخر ، مش كفاية علينا قطع الكهرباء يوميا وترددها العالي اللي بتحرق بيه الأجهرة، لأ كمان وضع المياة عندنا سيء جدا، المياة لا تأتي إلا ساعتين فقط طوال اليوم.
بيتم فتح محبس المياة من العمال تقريبا الساعة ١١ بليل ومش بنقدر نعمل أي حاجة، حتى احنا عاملين خزانات مش بنلحق نملاها وبتكون المياة ضعيفة جدا مش بتوصل للخزانات.
مش عارف مين المستفيد من قطع المياة،
هل العرب موالسين مع العمال لقطع المياة؟
ولا الجهاز بيعمل فينا كده ليه؟ وبيعاقبنا على إننا بنعمر الصحراء، الجهاز بيذلنا عشان يقفل علينا المحابس الفرعية، ويوقف تشغيل بوسترات الرفع؟!
العمال مش بيفتحوا المحابس الفرعية ع آخرها كمان.
احنا تعبنا اوي والله، أنا أوقات كتيرة بفضل صاحي لغاية الساعة ١ او ٢ ليلا عشان أملى مياة، ولو معرفتش أملي بشتري من العرب ال٥ متر ب ٥٠٠ جنيه.
الكلام ده ميرضيش ربنا وميرضيش أي بني آدم عنده ذرة رحمة، الحي المتميز فيه ٣٩٠٠ عمارة ، مش كلهم ساكنين ايوة بس احنا أزيد من ٥٠٠ أسرة بزوجاتهم وأولادهم، عاوزين أبسط حقوقنا في الحياة نقطة مياة نضيفة ناخدها بكرامة مش بمذلة وتقتير ونصحى لنص الليل عشان نملى متر مياة.
ياريت لو جهاز بدر مش عارف يحل المشكلة نساعده لو هما مش مقصرين لأني لا أعلم ما يدور عندهم، ولكن عدم توفير مياة وقطعها من المحابس الفرعية لتوفيرها لمناطق تانية بتوصل ليها المياة اكتر من ١٦ ساعة يعتبر تقصير وظلم لينا.
