فنجان قهوة ☕ للكاتبة الشابه ديمى بخيت

حلا بقالها سنتين معانا في الشركة، بنت لطيفة جدا و طيبة..حاولت اكتر من مره اعزمها علي فنجان قهوة بعد الشركة و كل مره ترفض بكسوف و تقولي : انا اسفة بجد ماتزعلش بس انا مش هينفع اخرج مع حد غريب وكمان مش هينفع اكدب علي البيت واقولهم خارجة مع صاحبتي..
طبعا زهقت من محاولاتي الفاشلة.. هي مش هتخرج معايا خلاص.. ولا هعرف اتكلم معاها علي راحتي.. اسكت مثلا؟ لا طبعاً.. آسر و رغد هما ال couple الوحيد اللي مخطوب من زمايلنا فظبطت خروجة بمناسبة خطوبتهم اللي كانت من سنتين اصلا.. اعمل ايه يعني مش لاقي مناسبة غير كده ترضي تيجي معانا فيها.. خلينا نعتبرها anniversary للخطوبة يعني.. وبعد مناقشات دامت ساعات طويلة قالتلي خلاص انا كلمت البيت و وافقوا بس علي شرط مانتأخرش..
روحنا الكافيه انا و حلا وآسر ورغد و زميلتنا ساندرا “تعتبر برنسيس المكتب ودايسة في أي خروجة”.. آسر قعد في وش رغد و حلا جمبها و في وشي و بيني وبين حلا قعدت ساندرا.. جه الجرسون واخد الطلبات و بعد ما مشي فكرت في فكرة جهنمية.. قمت علي اساس هعمل مكالمة وروحت عند الجرسون و شاورتله علي حلا كانت الوحيدة اللي طلبت نسكافيه مش قهوة و قلتله يرسم Marry me علي الوش ورجعت مكاني
شوية وقامت ساندرا للتواليت تظبط مكياجها كالعادة و بعدين فضلنا نتكلم و نهزر شوية و حلا جالها فون و استأذت تقوم ترد..
جه الجرسون وحط الطلبات و شاورلي انه كله تمام ..بعدين المصيبة بقي لما جات ساندرا لقت رغد بتفرج على فساتين في الفون ..فقعدت مكان حلا و لما حلا قربت من الطرابيزة ساندرا جاية تشرب الكافي بتاعتها في بصت عليها لقت مكتوب marry me فبصتلي و هي فرحانة وانا كمان بحبك اووي و كنت عارفة انك هتقولها..
حلا طبعا مكنتش لسه قعدت ففضلت باصة علي الفنجان لقت الرسمة وبعدين قعدت في المكان الفاضي جمبي.. انا عامل زي اللي ادلق علي مية متلجة في عز طوبة.. افرح علشان حلا قاعدة جمبي و لا اصوت علي المصيبة اللي حصلت و حلا طبعا باصة في الفنجان اللي قدامها و بتحرك ايديها عليه ولا كأنه حصل حاجة وانا لسه قاعد اهبل مش عارف اتصرف ازاي..
بعد كده حلا داقت الفنجان بتاعها وقالت ايه ده ماله مر اوي ليه كده ..فساندرا باصتلها لها و ضحكت قالتلها طبعا مره مش قهوة؟ فحلا قالت بس انا مطلبتش قهوة..
ساندرا ماكانتش لسه داقت الفنجان اللي ماسكاه
فقولت مابدهاش بقي روحت بدلت الفنجانين مع بعض وقولت : القهوة بتاعت ساندرا و النسكافيه ده بتاع حلا .. طبعا ساندرا لو عليها عايزة تقوم تديني بالشبشب دلوقتي.. فبصيت لحلا وقولتلها تتجوزيني؟ فضلت حلا متنحالي نص دقيقة كده من غير اي رياكشنات و بعدين بصت علي الفنجان بتاعها بقي اللي عليه الرسمة و جاية ترد خلاص.. راح موبايلها رن.. انا اتضايقت و قولت في بالي لسه هستني تقوم ترد و تيجي و كمان هفصل باصص لساندرا.. طبعا كل حاجة حصلت بسرعة اووي.. الغريب بقي ان حلا ردت قدامنا علي غير عادتها : الو! لا احنا خلصنا انا هستناك بره الكافيه، متتأخرش!… بعدين بصتلنا : ده رامي ابن عمي جاي ياخدني علشان اتاخرت.. كمان هعزمكم علي خطوبتنا قريب.. في، الكلمة دي باصتلي انا.. طبعا انا قاعد زي الاهبل حاسس اني اخدت علقة محترمة بس من غير ما حد يلمسني ولولا اني صحيت من الكابوس ده كنت اتخنقت.. ايوه بالظبط ده كله كان الحمدلله الحمدلله الحمدلله حلم
اول ماصحيت قررت لا خلاص انا مش هستني لما توافق نخرج والهبل ده انا اقولهالها وش.. روحت الصبح الشركة و قبل مانبدأ ندخل في الشغل روحتلها و قولتلها : حلا انا كنت عايز اسالك حاجة بس لو مش عايزة تجاوبي.. اعتبريني ماقولتش حاجة! بس كان باين عليا متعصب شوية.. فضحكت زي عادتها و قالتلي طب اهدي مالك داخل عصبي ليه كده.. دي صباح الخير؟ علي العموم صباح النور.. اتفضل..
فسالتها : هو انتي في حد في حياتك ؟ ابن عم ابن عمة ابن خال ابن خالة ابن الجيران ابن اي حد يعني؟
ففضلت ساكتة و هي كاتمة ضحكتها و بصالي
فقولتلها ممكن تجاوبي من غير ضحك ؟…فقالتلي و هي بتضحك بزيادة: طب انت متعصب ليه؟ لا مفيش بس ليه يعني؟
مكلمتش هي الكلمة فرحت خابطهالها : تتجوزيني؟
بصت بعيد و هي مبتسمة و مجاوبتش… وانا بقي مش اسكت و افهم لا اتعصب اكتر مانا عايز رد برضه ماهو مايبقاش في الحلم و الحقيقة : طب ايه يعني افرح ولا اصوت انا؟ جاوبي يابنتي
فكانت اول مره تبصلي تجاه عيني و تضحك كانت كل مره لما تتكلم معايا تتفادي عينيا بكل الطرق.. المره ده باقتلي و ضحكت و هزت راسها اللي هو موافقة يعني.. انا بقي بعيد عنكم حسيت قلبي طلع متر ونص قدامي زي توم و چيري و عصافير جمب وداني و قلوب طالعة من عيني و حالتي حالة.. و اخيراا وبعد طول انتظار طلبت منها عزومة علي فنجان قهوة بس المره دي مع باباها و في بيتهم..